Пілігрымка папы Францішка ў М’янму і Бангладэш адбудзецца з 26 лістапада па 2 снежня. Яе прэзентацыя прайшла 22 лістапада ў Ватыкане.
Паводле Грэга Бёрка, кіраўніка Залы Друку Апостальскай Сталіцы, падарожжа Папы ў Азію не будзе лёгкім. Бёрк прыгадаў аб існаванні некаторых праблем лагістычнага і камунікацыйнага характара. Напрыклад, прамая трансляцыя з шэрагу падзей з удзелам Святога Айца весціся не будзе.
Адной з далікатных тэмаў візіту ў М’янму стане сітуацыя мусульманскай меншасці рахінья. На працягу дзесяцігоддзяў яе прадстаўнікі зведваюць дыскрымінацыю і пераслед. Новы этап ганенняў пачаўся некалькі месяцаў таму. У сувязі з гэтым 30 лістапада адбудзецца прыватная сустрэча Папы з камандуючым м’янманскай арміяй генералам Мінам Аунгам Хлайнам.
Сітуацыя ў М’янме вельмі напружаная. Мясцовы епіскапат звярнуў увагу Папы на тое, што сама згадка аб народзе рахінья можа парушыць крохкую раўнавагу ў грамадстве. «Святы Айцец вельмі сур’ёзна ставіцца да парадаў, але ўбачым, што ён вырашыць зрабіць», — пракаментаў сітуацыю кіраўнік Залы Друку.
Тым не менш, група бежанцаў-рахінья прыме ўдзел у міжрэлігійнай і экуменічнай малітве ў інтэнцыі міру, якая пройдзе 1 снежня ў сталіцы Бангладэш — горадзе Дака. У гэтай краіне на працягу апошніх месяцаў знайшлі прытулак каля 620 тыс. рахінья.
Бёрк заўважыў, што падарожжа Папы ў М’янму і Бангладэш стане сведчаннем увагі Касцёла да «перыферый», як эканамічных, так і каталіцкіх. Цэнтральнымі тэмамі візіту будуць прымірэнне, прабачэнне і супакой. Пантыфік завершыць наведванне абедзвюх краін сустрэчамі з моладдзю, на знак «надзеі Касцёла адносна новых пакаленняў у будаванні будучыні», як адзначыў кіраўнік Залы Друку Святога Пасаду.
