Вярхоўная Рада Украіны мае намер разгледзець законапраект, у якім прапаноўваецца вызначыць 25 снежня святочным і непрацоўным днём.
Паводле «Интерфакс», 13 лістапада старшыня камітэта па пытаннях культуры і духоўнасці Украіны Мікалай Княжыцкі папрасіў унесці дадзены законапраект на разгляд парламента.
«Божае Нараджэнне — 25 снежня — прапаноўваецца зрабіць выхадным днём таксама як і 7 студзеня, паколькі ва Украіне шмат католікаў і пратэстантаў, якія просяць аб такіх зменах. І мы маем падтрымку залы», — сказаў дэпутат.
На сёння ва Украіне афіцыйным святочным днём з’яўляецца 7 студзеня — Раство па юліянскім календары, якім карыстаюцца Праваслаўная і Грэка-Каталіцкая Цэрквы.
Варта адзначыць, што ў Беларусі каталіцкае Божае Нараджэнне — 25 снежня — афіцыйна лічыцца святочным і выхадным днём і стаіць у адным шэрагу з іншымі рэлігійнымі святамі краіны.
