Папа Францішак прызначыў свайго Спецыяльнага пасланніка (Легата) на ўрачыстасці, якія пройдуць 21 ліпеня ў санктуарыі Маці Божай ва ўкраінскім Бярдычаве. Ім стаў найбліжэйшы супрацоўнік Святога Айца, Дзяржаўны сакратар Яго Святасці кардынал П’етро Паралін.
Як паведаміла Беларуская рэдакцыя парталу Vatican News, урачыстасці, у якіх возьме ўдзел прадстаўнік Папы Францішка, прымеркаваныя да завяршэння агульнанацыянальнай пілігрымкі ўкраінскіх католікаў у нацыянальны Марыйны санктуарый.
У папскім лісце, апублікаваным прэс-службай Святога Пасаду 13 ліпеня, нагадваецца, што святыня, якая знаходзіцца пад апекай кармэлітаў босых, атрымала статус Нацыянальнага санктуарыя ў 2011 годзе, але традыцыя пілігрымак туды шматвяковая. Яна ўзыходзіць да першай паловы XVII стагоддзя, калі ў 1630 годзе кіеўскі ваявода Януш Тышкевіч на знак падзякі за вызваленне ад татараў заснаваў у Бярдычаве кляштар і ахвяраваў яму абраз Маці Божай Снежнай, створаны ў XVI стагоддзі. Неўзабаве гэты абраз сталі ўшаноўваць вернікі з усёй краіны.
«Заахвочвайце ўсіх удзельнікаў гэтай урачыстасці нястомна маліць Каралеву супакою аб спыненні вайны ва Украіне і ва ўсіх частках свету, каб яны бралі прыклад з Благаслаўлёнай сярод жанчын, бо Яна найбольш даспадобы Богу, які рассейвае тых, хто пыхлівы сэрцам, і ўзвышае пакорных (пар. Лк 1, 51–52)», — напісаў Папа Францішак кардыналу Параліну.
Напрыканцы ліста Папа просіць свайго Легата несці яго благаслаўленне, а таксама «добразычлівасць і блізкасць у гэты надзвычай цяжкі для дарагога народа Украіны час».
Паведамляецца таксама, што суправаджаць Дзяржаўнага сакратара будуць рэктар семінарыі Кіева-Жытомірскай дыяцэзіі айцец Руслан Міхалкоў і сакратар Львоўскага Мітрапаліта лацінскага абраду айцец Андрэй Ляховіч.
