![](/3/images/news/2017/10/2017-10-27-2qcphdbu.jpg)
BBC запускае міні-серыял, у якім пакажуць паўсядзённае жыццё манахаў-бэнэдыктынаў у трох брытанскіх кляштарах. Пра гэта паведамляе Catholic News Agency.
Праект пакажа гледачам тыя аспекты жыцця манахаў, якія звычайна схаваны ад грамадскасці. Серыял будзе прысвечаны абацтвам Даўнсайд, Бельмонт і Плюскардэн. Іх жыццё пакажуць без закадравага тэксту, у выглядзе спакойнага сузірання штодзённага жыцця манахаў.
У саўндтрэк да серыяла ўвойдуць грыгарыянскія спевы і натуральны шум у кляштарах.
Першы эпізод, прысвечаны бэнэдыктынам з графства Сомерсет, выйдзе ў эфір у канцы кастрычніка 2017 г. Серыя, прысвечаная дэвізу ордэна «Маліся і працуй» (Ora et labora), распавядзе пра тое, як манахі пякуць хлеб і ладзяць традыцыйны малітоўны стол.
У дадатак да тэлесерыяла Радыё BBC запусціць у сваім эфіры падкасты, прысвечаныя духоўнаму жыццю бэнэдыктынаў.
З гісторыі ордэна
Бэнэдыктыны — старэйшы каталіцкі манаскі ордэн, заснаваны ў Італіі святым Бэнэдыктам Нурсійскім у VI ст.
Уклад бэнэдыктынаў у культуру і цывілізацыю заходняга грамадства вельмі вялікі, у эпоху ранняга Сярэднявечча бэнэдыктынскія кляштары былі галоўнымі крыніцамі культуры ў Заходняй Еўропе. Са школ пры абацтвах выйшлі практычна ўсе выбітныя вучоныя таго часу.
У бібліятэках пры кляштарах захоўвалі і перапісвалі старажытныя рукапісы, вялі хронікі. Пры кляштарах арганізоўвалі кірмашы, шпіталі. Прымаючы падарожнікаў, кляштары фактычна выконвалі ролю гасцініц.
Галоўны ўхіл у дзейнасці бэнэдыктынаў робіцца на малітвы, інтэлектуальныя заняткі, рэлігійнае мастацтва, місіянерскую працу.