Бельгійскае рэлігійнае Таварыства Братоў Міласэрнасці, нягледзячы на заклік папы Францішка, будзе працягваць дазваляць эўтаназію ў 15 псіхіятрычных бальніцах, якімі яно кіруе ў Бельгіі.
На прэс-канферэнцыі 12 верасня лідары бельгійскага Таварыства Братоў Міласэрнасці адзначылі, што лічаць іх палітыку не супярэчнай каталіцкаму маральнаму вучэнню, пры гэтым падкрэсліўшы, што «не можа быць і сумневу» ў іх вернасці вучэнню Касцёла. Паводле прадстаўнікоў рэлігійнага таварыства, іх палітыка «абараняе ідэю таго, што жыццё трэба захоўваць», але адначасова паважае свабоду ўрача «праводзіць эўтаназію ці не» ў іх бальніцах. У паведамленні прагучала таксама, што ўрачы маюць права адмовіцца ад правядзення эўтаназіі.
Таварыства Братоў Міласэрнасці прыняло дадзеную палітыку ў іх бельгійскіх клініках у красавіку 2017 г. Настаяцель таварыства брат Рэнэ Стокман асудзіў іх рашэнне і звярнуўся да Ватыкана з просьбай умяшацца.
Паводле рашэння Апостальскай Сталіцы, правінцыя Таварыства Братоў Міласэрнасці ў Бельгіі да канца жніўня мела час, каб запэўніць, што ва ўстановах, якія ім належаць, не будзе праводзіцца эўтаназія.
Брат Стокман у жніўні таксама адзначыў, што ў выпадку непадпарадкавання закліку Пантыфіка клінікі будуць пазбаўлены каталіцкай ідэнтычнасці.
