Каля 6, 8 млн чалавек прыняло ўдзел у сустрэчах з папам Францішкам падчас яго пяцідзённага візіту ў Калумбію. Пра гэта паведамляе агенцтва KAI.
Пантыфік пераадолеў 1466 км (1331 км у паветры і 135 км па сушы). У Калумбіі Святы Айцец прыняў удзел у 29 пунктах праграмы: чатырох Імшах, 11 праездах у папамабілі, а таксама 14 іншых падзеях і цырымоніях.
Падчас візіту было задзейнічана больш за 36 тысяч паліцэйскіх і салдат, а таксама больш за 19 тысяч валанцёраў, 9,7 тысяч адказных за лагістыку, 7,8 тысяч медыкаў і 600 пажарных.
На працягу 90 гадзін прабывання Пантыфіка ў Калумбіі колькасць злачынстваў у гэты час скарацілася на 70 працэнтаў у параўнанні з аналагічным перыядам мінулага году.
«Мы былі сведкамі Апостальскага візіту, падчас якога калумбійцы мелі ўнікальную магчымасць паслухаць Папу Рымскага. Іх паводзіны былі ўзорнымі, як і сумесная праца паміж Ватыканам, урадам Калумбіі і мясцовым епіскапатам», — адзначыў у каментарыі віцэ-прэзідэнт Калумбіі.
