12 жніўня ў Базыліцы Святога Пятра ў Рыме прайшла агульная аўдыенцыя Святога Айца Льва XIV, у якой упершыню прыняў удзел біскуп Гродзенскі Уладзімір Гуляй. Яго прысутнасць стала важнай падзеяй для беларускай каталіцкай супольнасці.
Галоўнай тэмай сустрэчы сталі разважанні Пантыфіка пра каштоўнасць літургічнага года і значэнне нядзельнай Эўхарыстыі ў жыцці кожнага верніка. Звяртаючыся да пятага раздзела канстытуцыі Другога Ватыканскага Сабору Sacrosanctum Concilium, Папа заўважыў, што літургічны год — гэта не проста ўспамін мінулых падзей, але пастаяннае ажыццяўленне справы збаўлення, якую Хрыстус здзяйсняе ў гісторыі.
Асобна Святы Айцец спыніўся на нядзелі, якую айцы Сабору назвалі «падмуркам і ядром літургічнага года» і «першапачатковым святочным днём». Ён нагадаў вучэнне святога Яна Паўла II, паводле якога нядзеля — гэта дзень Пана, дзень Касцёла, дзень чалавека і «дзень дзён».
Леў XIV падкрэсліў, што для асвячэння нядзелі неабходны асабісты ўдзел у Эўхарыстыі, і літургічны сход вернікаў не можа быць заменены выключна віртуальнай прысутнасцю.
У гэтай сувязі Пантыфік заклікаў шукаць найлепшыя ўмовы, каб у святой Імшы маглі ўдзельнічаць і тыя, хто ў нядзелю вымушаны працаваць.
«Сустрэча з Езусам, памерлым і ўваскрослым за нас, — гэта мэта, якую Касцёл заўсёды ставіць перад сабой»,
— сказаў Святы Айцец, робячы акцэнт на цэнтральным месцы Пасхальнай таямніцы.
У другой частцы аўдыенцыі Святы Айцец закрануў канкрэтныя гуманітарныя выклікі сучаснасці. Леў XIV асобна ўзгадаў калумбійцаў, якія сталі ахвярамі нядаўняга землятрусу, і выказаў блізкасць сем'ям загінулых і ўсім, хто перажывае наступствы катастрофы.
Па завяршэнні аўдыенцыі Леў XIV асабіста прывітаўся з іерархамі, сярод якіх быў біскуп Уладзімір Гуляй. Гродзенскі іерарх перадаў Святому Айцу гарачыя прывітанні ад святароў і вернікаў сваёй дыяцэзіі, якая сёлета адзначае 35-гадовы юбілей, а таксама запэўніў Пантыфіка ў сардэчнай малітве за яго служэнне.
