Падчас апостальскага падарожжа ў Калумбію, якое завяршылася 11 верасня, папа Францішак сустрэўся з дзецьмі з дыяцэзіяльнага дзіцячага дома «Огар-дэ-Сан-Хасэ» ў Медэльіне, якія былі пакінуты бацькамі або сталі ахвярамі насілля.
Нагадваючы пра гэтыя сумныя абставіны, Папа сказаў, што, калі глядзіш на гэтых дзяцей, «баліць душа». «Езус іх палюбіў, і нельга згаджацца з тым, што з імі дрэнна абыходзяцца, пазбаўляючы права на радаснае і спакойнае дзяцінства і права на будучыню», — падкрэсліў Пантыфік.
У «Доме святога Юзафа» дзеці знайшлі другую сям’ю, пра што Папу расказала адна з жыхарак дзіцячага дома.
Святы Айцец нагадаў, што Езус у дзяцінстве таксама быў ахвярай нянавісці і пераследу, Ён мусіў пакінуць сваю зямлю, свой дом, каб пазбегнуць смерці. Езус, падкрэсліў Папа, «не пакідае нікога з тых, хто церпіць», тым больш дзяцей.
Манахаў і свецкіх, якія апякуюцца дзецьмі з «Дома святога Юзафа», Пантыфік заклікаў не губляць іх з полю зроку, зыходзячы з двух аспектаў, якія вылучаюць хрысціянства: «бачыць Езуса ў самых малых і слабых» і «весці дзяцей да Езуса».
Святы Айцец пажадаў, каб заступніцтва святога Юзафа натхняла іх на клопат аб дзецях, «якія з’яўляюцца будучыняй калумбійскага грамадства, усяго свету і ўсяго Касцёла».
