«Не існуе сужэнстваў паміж асобамі аднаго полу», — сказаў Патрыярх Копцкай Праваслаўнай Царквы Тавадрас ІІ адразу пасля прыбыцця ў Аўстралію ў інтэрв’ю мясцовым журналістам.
Да Патрыярха было скіравана менавіта гэтае пытанне, бо ў гэтыя дні ў Аўстраліі праходзіць жывая грамадская дыскусія, выкліканая хуткім рэферэндумам на тэму сужэнства і легалізацыі аднаполых саюзаў. Рэферэндум пройдзе 12 кастрычніка.
Спасылаючыся на Святое Пісанне, Тавадрас ІІ патлумачыў, што Бог устанавіў саюз мужчыны і жанчыны, іншыя ж формы з’яўляюцца недапушчальнымі і грэшнымі. «З пункту гледжання хрысціянскай веры, саюзы такога роду трэба цалкам адкінуць», — дадаў Патрыярх Копцкай Праваслаўнай Царквы.
Іерарх на працягу дзесяці дзён будзе прабываць у Аўстраліі, дзе сустрэнецца з прадстаўнікамі ўлады і Копцкай Царквы, мясцовая супольнасць якой — трэцяя па велічыні за межамі Егіпта.
