17 верасня Каталіцкі Касцёл у ЗША правядзе «Нядзелю катэхізатара» на тэму місіянерства. Дэвізам гэтага адмысловага дня будзе заклік «Жыць як вучні-місіянеры».
Такое мерапрыемства праходзіць у краіне штогод у трэцюю нядзелю верасня і з’яўляецца «добрай магчымасцю задумацца пра ролю кожнага чалавека, якую ён моцай сакрамэнту хросту адыгрывае ў перадаванні веры і ў сведчанні Евангелля», — адзначаецца ў інфармацыйным паведамленні біскупскай канферэнцыі ЗША.
Ксёндз прэлат Леанард Блэр, які ўзначальвае Біскупскую камісію па евангелізацыі і катэхізацыі, звярнуўся да паствы з пасланнем, заклікаючы вернікаў прыняць удзел у «Нядзелі катэхізатара».
«Я малюся, — піша святар, — каб праз сакрамэнты, прыватную малітву, глыбокае пазнанне веры і евангельскае сведчанне мы маглі ўзрастаць у любові Пана і пашыраць евангелізацыйную місію Касцёла».
