Колькасць пакліканняў у закрыты кляштар кармэлітанак узрасла настолькі, што кіраўніцтва ордэну вырашыла адкрыць яшчэ адзін кляштар.
Добрая навіна прыйшла са Злучаных Штатаў Амерыкі. У клаўзуровым кляштары сясцёр кармэлітанак босых у Марыстане (штат Нью-Джэрсі) узрасла колькасць пакліканняў. На сёння ў кляштары, разлічаным на 18 манахінь, жыве ўжо 21 сястра. І колькасць дзяўчат, якія распачынаюць пастулат, павялічваецца.
Настаяцельніца кляштару, с. Тэрэза Катульскі, аб’явіла аб адкрыцці яшчэ аднаго кляштару на Мальце: «Мы ўдзячныя Пану Богу за развіццё нашай супольнасці. Яшчэ некалькі гадоў таму нас было так мала, а сёння так шмат дзяўчат шукае адказу на пакліканне да кантэмпляцыі. Гэта цуд, які адбываецца на нашых вачах».
На Мальту адправіцца пяць сясцёр, каб несці служэнне мясцоваму Касцёлу ў новым кляштары. Каталіцкая традыцыя на востраве мае глыбокія карані, але ў апошнія гады настроі грамадства пад уплывам секулярызацыі змяняюцца і там, у выніку чаго грамадства становіцца ўсё менш каталіцкім.
Супольнасць кармэлітанак босых была заснавана ў XVI ст. у выніку рэформы ордэна кармэлітаў св. Тэрэзай ад Езуса і св. Янам ад Крыжа. Жыццё ў клаўзуры з’яўляецца выражэннем і спосабам наследаваць Хрыста згодна з евангельскімі парадамі. Кіруючыся пакліканнем да кантэмпляцыі (малітва ў засяроджанні), кармэлітанкі босыя даюць абавязак захоўваць закрыты стыль жыцця.
