Арганізатары Сусветных дзён моладзі ў Паўднёвай Карэі запрашаюць кампазітараў і паэтаў стварыць музычны твор, які аб'яднае маладых людзей з усяго свету.
Арганізацыйны камітэт Сусветных дзён моладзі 2027 года абвясціў конкурс на гімн будучай сустрэчы, якая адбудзецца ў сталіцы Паўднёвай Карэі Сеуле пад дэвізам «Будзьце адважнымі! Я перамог свет» (Ян 16, 33). Твор павінен не толькі суправаджаць падзею, але перш за ўсё аб'ядноўваць сэрцы маладых людзей з усяго свету і стаць выразам духу СДМ таксама пасля іх завяршэння.
Арганізатары падкрэсліваюць, што гімн Сусветных дзён выходзіць за рамкі звычайнага музычнага афармлення. Яго роля — інтэграваць удзельнікаў і будаваць пачуццё супольнасці. У Сеуле ён будзе натхнёны евангельскім заклікам, які нагадвае пра перамогу Хрыста і пра мір, якога патрабуе маладое пакаленне ў свеце, пазначаным падзеламі, хуткім тэмпам змен і трывогай.
Форум у Паўднёвай Карэі, краіне сучаснай тэхналогіі і багатай традыцыі, павінен стаць сведчаннем прымірэння і місіі, асабліва ўлічваючы, што хрысціяне не складаюць там большасці.
Конкурс адкрыты для ўсіх, незалежна ад узросту, рэлігіі ці нацыянальнасці. Заяўкі неабходна даслаць да 30 лістапада 2025 года на электронны адрас themesong@wydseoul.org. Кожны ўдзельнік можа прапанаваць максімум тры арыгінальныя кампазіцыі, якія ўключаюць тэкст і музыку.
Арганізатары вітаюць разнастайнасць музычных жанраў і заахвочваюць да творчай свабоды. Галоўныя патрабаванні да твораў — яны павінны добра перакладацца на іншыя мовы, падыходзіць для выканання хорам і быць прыдатнымі для харэаграфічнага суправаджэння.
Для ўдзелу ў конкурсе неабходна даслаць:
- запоўненую рэгістрацыйную анкету,
- кароткае апісанне творчай канцэпцыі,
- поўны тэкст песні,
- падпісаную згоду на выкарыстанне твора,
- аўдыёзапіс (у фармаце MP3 ці WAV) з галоўнай вакальнай партыяй.
Ацэнцы будуць падлягаць:
- вернасць тэме СДМ,
- мастацкая вартасць і арыгінальнасць,
- прывабнасць і лёгкасць спявання,
- магчымасць навучання і запамінання,
- патэнцыял для адаптацыі ў іншых мовах і культурах,
- прыдатнасць для харавых аранжыровак і харэаграфіі.
Пераможца конкурсу атрымае памятную ўзнагароду, афіцыйнае прызнанне аўтарства гімна СДМ-2027, а таксама аплачаную паездку для ўдзелу ў сустрэчы моладзі ў Сеуле.
Усе падрабязнасці конкурсу і поўныя правілы размешчаны на афіцыйным сайце.
