8 жніўня ў маляўнічай парафіі святога Казіміра ва Уселюбе (Навагрудскі дэканат, Гродзенская дыяцэзія) прайшоў чарговы хрысціянскі фестываль-рэкалекцыі Novafest. Сёлета яго тэмай сталі словы прарока Ёэля: «Звярніцеся да Мяне ўсім сэрцам сваім» (Ёэл 2, 12).
Фестываль Novafest нарадзіўся ў гэтай парафіі ў 2021 годзе і адразу ператварыўся ў значную падзею для Каталіцкага Касцёла ў Беларусі. Кожны год ён збірае пад адным дахам тых, хто шукае духоўнага абнаўлення і прагне пазнаць Бога. Сёлета сярод удзельнікаў Novafest былі святары, манаскія асобы і вернікі з розных дыяцэзій Беларусі, што яшчэ раз падкрэслівае яднальны характар гэтага духоўнага свята.
Урачыстую святую Імшу ўзначаліў біскуп Віцебскі Алег Буткевіч. У сваім слове іерарх падзякаваў шматгадовым арганізатарам свята веры на чале з ксяндзом Віталіем Цыбульскім за іх няспынны клопат пра духоўнае развіццё вернікаў. Асаблівым госцем і спікерам стаў айцец Аляксандр Жарнасек MIC, які прамовіў канферэнцыю на тэму «Мудрасць сэрца», заклікаючы ўдзельнікаў да глыбокага ўнутранага пазнання.
Праграма фестывалю была накіравана на стварэнне атмасферы няспыннай малітвы. Акрамя Імшы і канферэнцый, вернікі разам маліліся Вяночак да Божай Міласэрнасці і ішлі Крыжовым шляхам. Адным з самых кранальных момантаў сталі сведчанні гасцей, калі яны дзяліліся асабістымі гісторыямі пра дзеянне Бога ў сваім жыцці.
Асаблівую радасць выклікала «малітва ў руху» — час, адведзены для танцаў, які арганізатары традыцыйна ўключылі ў праграму.
Завяршыўся доўгі дзень агульнай адарацыяй Найсвяцейшага Сакрамэнту — момантам падзякі Богу за ўсе атрыманыя дары, якія былі падараваны на навагрудскай зямлі.
Фестываль Novafest ужо стаў не проста падзеяй, а сапраўднай калыскай валанцёрскага руху і месцам сустрэчы з жывым Богам для многіх людзей з розных куткоў Беларусі.
