6 лістапада ў катэдральным касцеле Беззаганнага Зачацця Найсвяцейшай Панны Марыі ў Маскве (Расія) адбылася святая Імша аб вечным жыцці для памерлага айца Пятра Карнелюка OFMConv.
Настаяцель францішканскага кляштара ў Маскве і душпастыр маскоўскіх беларусаў каталіцкага веравызнаньня адышоў у вечнасць 4 лістапада.
Набажэнства адбылося з удзелам ардынарыя архідыяцэзіі Маці Божай у Маскве, Старшыні Канферэнцыі Каталіцкіх Біскупаў Расіі арцыбіскупа Паоло Пэццы, Апостальскага Нунцыя ў Расіі арцыбіскупа Джаванні Д’Аньела і ардынарыя дыяцэзіі святога Клімэнта ў Саратаве біскупа Клеменса Пікеля, братоў францішканаў Расійскай кустодыі, шматлікіх святароў і манаскіх асобаў.
Поўная святыня вернікаў стала сведчаннем сапраўднай любові да айца Пятра.
Пад гукі аргана і малітоўныя спевы ў выкананні хору, што асабліва любіў спачылы айцец Пётр, які меў музычную адукацыю, вернікі развіталіся са сваім душпастырам. У суботу ў Маскве будзе цэлебравацца Імша на беларускай мове ў памяць пра душпастыра мсцовых беларусаў, які так нечакана пакінуў сваю паству.
Пасля Імшы і развітання ў маскоўскай катэдры машына з труной айца Пятра рушыла на яго радзіму, у Беларусь, да роднага дома ў вёсцы Старое Сяло на Брэстчыне.
Пахаванне спачылага айца Пятра Карнелюка адбудзецца ў пятніцу 8 лістапада ў парафіі Найсвяцейшай Тройцы ў Чарнаўчыцах (Пінскаая дыяцэзія, Брэсцкі дэканат). Пачатак пахавальнай святой Імшы ў 13.30.
