З 24 па 27 мая ў Кракаве (Польшча) праходзіў Другі з’езд беларусаў-католікаў замежжа.
Сёлета ўдзел у сустрэчы ўзялі каля 70-і дэлегатаў, большасць з якіх паходзілі з Мінска-Магілёўскай архідыяцэзіі.
На запрашэнне адгукнуліся супольнасці з васьмі гарадоў Польшчы: Беластока, Варшавы, Гданьска, Кракава, Лодзі, Любліна, Познані, Торуні, Уроцлава.
Галоўным арганізатарам сустрэчы стала душпастырства беларусаў Кракава на чале з ксяндзом Юрыем Рашатко.
З’езд распачаўся са святой Імшы ў кракаўскім касцёле святога Стэфана, дзе на малітву штонядзелю збіраюцца беларусы каталіцкага веравызнання. Літургію ўпрыгожылі ўзнёслыя спевы хору, які зусім нядаўна склаўся з прадстаўнікоў мясцовага душпастырства. Святую Імшу цэлебраваў душпастыр кракаўскіх беларусаў ксёндз Юрый Рашатко. Святар настройваў удзельнікаў з’езду на плённую працу і прасіў аб Божым бласлаўленні для іх на бліжэйшыя тры дні.
У пятніцу падчас вячэры ўдзельнікі з’езду знаёміліся паміж сабою, дзяліліся навінамі з землякамі, распавядалі пра сваё жыццё ў Польшчы і абмяркоўвалі далейшыя планы.
Кракаўская супольнасць паклапацілася пра начлег для ўсіх, хто меў у гэтым патрэбу. Большасць удзельнікаў з’езду прыехала на наступны дзень, у суботу. Раніцай, пасля рэгістрацыі і снедання, прысутныя памаліліся Ютрань.
Удзельнікаў з’езду па відэасувязі прывітаў біскуп Алег Буткевіч. Віцэстаршыня ККББ перадаў благаслаўленне ад усіх біскупаў Беларусі для беларускай дыяспары і благаславіў удзельнікаў з’езду.
Падчас сустрэчы кожная супольнасць мела магчымасць прадставіць сваю дзейнасць, падзяліцца навінамі і планамі. Прадстаўнікі розных душпастырстваў падрыхтавалі прэзентацыі. Аўдыторыя хутка рэагавала на агучаныя праблемы, людзі дзяліліся вопытам і карыснымі кантактамі.
Пасля адбылася прэзентацыя ватыканскай інструкцыі Erga migrantes caritas Christi («Любоў Хрыста да мігрантаў»). Гэты дакумент з’яўляецца касцёльным адказам на душпастырскія патрэбы мігрантаў, акрэслівае іх правы, а таксама разглядае прычыны міграцыі ў сучасным свеце.
Напачатку арганізатары тэзісна пазнаёмілі прысутных са зместам ватыканскай інструкцыі.
Пасля ўдзельнікі з’езду падзяліліся на группы, каб у святле дакументу Святога Пасаду разам шукаць адказы на пытанні, з якімі яны сутыкаюцца ў сваіх супольнасцях, і разважалі над тым, што яшчэ можна зрабіць для католікаў беларускага паходжання, якія сёння жывуць у Польшчы.
Пасля перапынку ўдзельнікі з’езду маглі прадставіць Богу свае інтэнцыі падчас адарацыі. Беларуская дыяспара таксама малілася аб Божым благаслаўленні для новага біскупа каад’ютара Гродзенскай дыяцэзіі Уладзіміра Гуляя ў дзень яго біскупскага пасвячэння. Ахвотныя маглі прыступіць да сакрамэнту споведзі.
Пасля маёвага набажэнства да Найсвяцейшай Панны Марыі прысутныя вырушылі на вакзал. Удзельнікаў з’езду чакала экскурсія ў саляной шахце Вялічка, якая знаходзіцца непадалёк ад Кракава. Беларусы наведалі некалькі падземных капліц, пабачылі рэлігійныя скульптуры, выразаныя з солі, а таксама абразы, фрэскі і іншыя прыкметы хрысціянскага ладу жыцця былых «жыхароў» шахты.
У капліцы святога Яна Паўла ІІ упершыню адбылася Літургія на беларускай мове. На глыбіні 135 метраў удзельнікі з’езду маліліся ў тых інтэнцыях, якія прынеслі ў сваім сэрцы.
Галасы кракаўскага хору напоўнілі падземную капліцу і, адбіваючыся ад саляных сценаў, нібы прабівалі тоўшчу зямлі, каб узнесціся да Нябёсаў.
У нядзелю ўдзельнікі з’езду маліліся ў езуіцкай базыліцы Насвяцейшага Сэрца Езуса разам з пілігрымамі з Беларусі, якія, на чале з ксяндзом Аўгустам Калясінскім, вярталіся з вандроўкі з Будапешта ў Мінск.
Пасля Эўхарыстыі ўдзельнікі падвялі вынікі сустрэчы і падзяліліся сваімі ўражаннямі. Напрыканцы ахвотныя маглі далучыцца да экскурсіі па беларускіх месцах Кракава.
Душпастырствы беларусаў Польшчы ўдзячныя ахвярадаўцам, а таксама кракаўскай супольнасці беларусаў і ксяндзу Юрыю Рашатку за арганізацыю з’езду.
