Новы біскуп Хельсінкі Раймо Гаярола лічыць, што ў Фінляндыі, якая калісьці належала да гістарычнай Магілёўскай мітраполіі, замала касцёлаў і яны недастаткова вялікія, каб змясціць вернікаў.
Пасвячаны ў лістападзе мінулага года іерарх візітуе парафіі сваёй вялікай дыяцэзіі, якая ахоплівае ўсю тэрыторыю Фінляндыі. Нядаўна ён наведаў парафію святога Олафа ў горадзе Ювяскюля, што знаходзіцца у 270 км ад Хельсінкі. Там біскуп цэлебраваў Імшу і ўдзяліў сакрамэнт канфірмацыі групе мясцовых католікаў. У сацыяльных сетках іерарх напісаў, што касцёл быў перапоўнены людзьмі. Пытанне недахопу месца было ўзнята на сустрэчы біскупа з парафіяльнай радай і з фінансавай радай парафіі.
Ва ўсёй Фінляндыі дзейнічае восем каталіцкіх парафій. У краіне нясуць служэнне 30 святароў і налічваецца 17 тыс. афіцыйна зарэгістраваных вернікаў, хоць паводле некаторых ацэнак іх фактычна ў два разы больш, у большасці эмігрантаў.
Біскуп Гаярола, якому сёлета спаўняецца 55 гадоў, па паходжанні баск, па першай адукацыі медык. Ён належыць на прэлатуры Opus Dei. У 2006 годзе прыехаў у Фінляндыю для душпастырскай працы.
Папярэдні біскуп Хельсінкі фін Тээму Сіпа падаў у адстаўку ў 2019 годз па стане здароўя. Наступніка дыяцэзія чакала ажно да лістапада мінулага года. У гэты час яе адміністратарам быў малады італьянскі святар Марко Пасіната.
