24–26 студзеня ў сталіцы Кеніі Найробі збяруцца еўрапейскія і афрыканскія біскупы, каб супольна абмеркаваць леташнюю першую сесію Сіноду Біскупаў па сінадальнасці.
Як паведамляе Каталіцкае інфармацыйнае агенцтва КАІ, cустрэча арганізаваная Радай Канферэнцый Біскупаў Еўропы (CCEE) і Сімпозіумам Біскупскіх Канферэнцый Афрыкі і Мадагаскара (SECAM).
У першы дзень прэзідэнт SECAM кардынал Фрыдалін Амбонга Бэсунгу з Дэмакратычнай Рэспублікі Конга і віцэ-прэзідэнт CCEE кардынал Жан-Клод Ольрыш з Люксембурга прадставіць два пункты гледжання на тэму: «Разуменне новага сінадальнага Касцёла ў святле Prædicate Evangelium».
Потым прэзідэнт CCEE арцыбіскуп Віленскі Гінтарас Грушас і віцэ-прэзідэнт SECAM арцыбіскуп Лусіу Андрысэ Муандула з Мазамбіка прадставяць «Кантынентальныя ўражанні ад першай сесіі Сіноду па сінадальнасці».
Другі дзень будзе прысвечаны тэме: «Як Касцёл можа слухаць маладых людзей у Афрыцы і Еўропе ў святле сінадальнага працэсу». Гэтае разважанне прадставяць арцыбіскуп Аляксандр Жолі з Францыі і біскуп Бэрнардын Фрэнсіс Мфумбуса з Танзаніі.
У трэці дзень біскупы абодвух кантынентаў будуць цэлебраваць святую Імшу ў катэдры Найробі.
