2 снежня, напярэдадні Адвэнту, беларусы каталіцкага веравызнання ў Польшчы сабраліся ў варшаўскім касцёле святога Аляксандра, каб узнесці малітву падзякі за дапамогу мясцовага Касцёла ў справе адраджэння Касцёла ў Беларусі.
Падобная сустрэча праходзіла ўжо ў другі раз з нагоды штогадовага агульнапольскага дня Дапамогі Касцёлу на Усходзе, які адзначаецца ў Другую нядзелю Адвэнту. Беларусы ў малітве дзякуюць за дапамогу, якую Касцёл у Польшчы аказваў і працягвае аказваць Касцёлу ў Беларусі.
Цэлебрацыю святой Імшы ўзначаліў біскуп Кшыштаф Задарка, Старшыня Рады па справах мігрантаў, турызму і пілігрымак пры польскім епіскапаце. На малітоўную сустрэчу сабраліся прадстаўнікі душпастырстваў беларусаў з усёй краіны. У прамоўленай гаміліі біскуп Задарка шмат увагі прысвяціў супольным момантам у гісторыі Польшчы і Беларусі, падкрэсліўшы каштоўнасць шматвяковых духоўных сувязяў абодвух народаў.
«Беларусы не з’яўляюцца нейкім дадаткам, малодшай сястрой ці братам, а роўнымі з роўнымі», — сцвердзіў іерарх.
«Нашы супольныя лёсы — лёсы Польшчы і Беларусі — навучылі нас быць разам, навучылі салідарнасці. Гэтыя лёсы навучылі нас словам „насіце цяжары адзін аднаго“, якія святы Павел скіроўваў да першых хрысціянаў. Насіце цяжары адзін аднаго і ніколі — адзін супраць другога. Ментальнасць кіраўнікоў гэтага свету ў тым, каб няспынна дзяліць і такім чынам валадарыць. Ментальнасць Езуса Хрыста, Валадара Сусвету, вучыць нас таму, як быць разам і не дзяліць, а яднаць», — дадаў біскуп Задарка.
Іерарх пагадзіўся з тым, што жыццё ў эміграцыі часта бывае няпростым. Калісьці, яшчэ да біскупскага пасвячэння, ён нёс служэнне ў душпастырстве палякаў у Швейцарыі, і таму з уласнага досведу знаёмы са штодзённасцю эмігрантаў.
«Жыццё ў эміграцыі заўжды з’яўляецца жыццём чалавека „другой катэгорыі“. Аднак у каталіцкім Касцёле няма чужынцаў: усе з’яўляюцца братамі і сёстрамі. Касцёл нас вучыць таму, каб моцай Божай ласкі разбураць усе муры. У гэтым — прыгажосць хрысціянскай веры», — падкрэсліў прадстаўнік польскага епіскапату.
Пасля Эўхарыстыі адбылася сустрэча біскупа Задаркі з беларусамі. Прадстаўнікі супольнасцяў з Беластока, Варшавы, Вроцлава, Гданьска, Кракава, Лодзі і Познані распавялі пра сваю дзейнасць і задавалі іерарху пытанні.
Біскуп Кшыштаф Задарка звярнуў увагу на тое, што беларусы з’яўлюцца піянерамі ў справе арганізацыі нацыянальных душпастырстваў у Польшчы. Ён заахвоціў прысутных не спыняцца і працягваць развіццё супольнасцяў.
Напрыканцы сустрэчы ўдзельнікі сабраліся на абед. Пры братнім стале абмяркоўваліся далейшыя планы сумесных праектаў, адбывалася дзяленне вопытам.
