Чарговае пленарнае пасяджэнне Рады Канферэнцый Біскупаў Еўропы (РКБЕ) пройдзе 27–30 лістапада ў сталіцы Мальты Валеце. Сустрэча будзе датычыцца «новых крокаў на карысць сінадальнага Касцёла ў Еўропе».
Як паведаміла Беларуская рэдакцыя парталу Vatican News, Генеральны сакратар Сіноду Біскупаў кардынал Марыё Грэк абмяркуе працу XVI Генеральнай асамблеі, першая сесія якой праходзіла ў Ватыкане з 4 па 29 кастрычніка, а таксама дасць рэкамендацыі для падрыхтоўкі да другой сінадальнай сесіі ў кастрычніку наступнага года.
У сваю чаргу генеральны дакладчык (рэлятар) Сіноду кардынал Жан-Клод Ольрыш закране тэму адносін паміж транснацыянальнымі структурамі і сінадальнасцю для новага місійнага запалу Касцёла ў Еўропе.
Нарэшце, польскі кардынал Гжэгаж Рысь праінфармуе аб прагрэсе ў дзейнасці рабочай групы, якая займаецца абнаўленнем Экуменічнай хартыі — дакумента аб супрацоўніцтве хрысціянскіх Цэркваў у Еўропе, падпісанага ў 2001 годзе старшынямі Рады Канферэнцый Біскупаў Еўропы і Канферэнцыі Еўрапейскіх Цэркваў.
У цяперашні час РКБЕ складаецца з 39-і членаў: 33-х старшынь біскупскіх канферэнцый, асобна арцыбіскупаў Люксембурга, Манака і Кіпра (мараніцкага абраду), біскупаў Кішынёва і Мукачава (усходняга абраду) і апостальскага адміністратара Эстоніі.
Разам яны прадстаўляюць 45 краін Еўропы. Старшынёй Рады з’яўляецца арцыбіскуп Віленскі Гінтарас Грушас. Старшянёй Канферэнцыі Каталіцкіх Біскупаў у Беларусі з’яўляецца біскуп Віцебскі Алег Буткевіч.
