У нядзелю 17 верасня ў Гданьску (Польшча) адбыўся першы фэст душпастырства беларусаў.
Урачыстасць распачалася святой Імшой у касцёле святога Юзафа ў самым цэнтры Гданьска. Менавіта тут разам са сваім душпастырам ксяндзом Пятром Врубелем збіраюцца беларусы, якім, далёка ад Бацькаўшчыны, важна разам удзельнічаць у малітве на роднай мове.
«Гэта быў наш першы „парафіяльны“ фэст. Супольнасць існуе ўжо два гады, з верасня 2021, таму ў пэўным сэнсе ён быў для нас асаблівы. Разам рыхтуючыся да фэсту, мы адчулі сапраўднае хрысціянскае братэрства, было шмат ахвотных паслужыць, але не так шмат працы»,
— адзначае Павел Граковіч, адзін з арганізатараў фэсту.
У Эўхарыстыі, цэлебрацыю якой узначаліў душпастыр супольнасці, быў таксама ксёндз Анджэй Бульчак — святар, які доўгі час працаваў у Беларусі, а цяпер нясе служэнне пробашча ў парафіі Найсвяцейшай Панны Марыі Маці Касцёла і святой Кацярыны Шведскай у Гданьску і з радасцю дамапагае ў паслузе беларусам.
Святары разам з прысутнымі дзякавалі Пану Богу за дар супольнасці і ўсе тыя дары, якімі Ён адорвае іх кожны дзень.
Падчас Літургіі некалькі хлопцаў былі ўрачыста прынятыя ў кандыдаты ў міністранты.
Напрыканцы адбылася малітва да Маці Божай Браслаўскай, Валадаркі азёраў — апякункі супольнасці. Парафіяне даверылі Яе заступніцтву свае справы, а таксама прасілі, каб Яна была для іх прыкладам адданага мацярынства і апекавалася іх сем’ямі.
Пасля Святой Імшы ў Цэнтры адукацыі і культуры, якім апякуюцца місіянеры аблаты, адбыўся канцэрт беларускага гурта ZnakStop, пачастунак і конкурс на найлепшае печыва.
Супольнасць беларусаў у Гданьску — другая па велічыні ў Польшчы пасля Варшавы.
Святыя Імшы адбываюцца кожную нядзелю ў 14.30 у касцёле святога Юзафа па адрасе: Elżbietańska 9.
Акрамя Эўхарыстыі, у душпастырстве адбываюцца штонядзельныя сустрэчы міністрантаў, два разы на месяц для дзяцей праводзяць катэхезы, раз на месяц збіраецца каталіцкі кінаклуб.
