Біскуп Вальтэр Гілен Сота SDB з дыяцэзіі Грасіяс у Гандурасе ў ліпені пацвердзіў Эўхарыстычны цуд, які задрыўся год таму ў невялікай супольнасці, дзе штодзённа нават няма святара.
Як паведаміла Aleteia, 9 чэрвеня мінулага года ў невялікай вёсцы Эль-Эспіналь у свята Езуса Хрыста, Найвышэйшага і Вечнага Святара, надзвычайны распарадчык святой Камуніі Хасэ Элмер Бэнітэс Мачада заўважыў у табэрнакулюме штосьці незвычайнае.
У той чацвер а 17-й гадзіне распачалася Літургія слова, падчас якой адбываўся таксама абрад Камуніі. У капліцы сабраліся каля 15-і сем’яў.
Калі надзвычайны распарадчык Камуніі Хасэ, які праводзіў набажэнства, адкрыў табэрнакулюм, ён заўважыў у ім штосьці, што нагадвала плямы крыві.
Яны былі на карпарале — спецыяльнай літургічнай тканіне, на якой стаяла драўлянае начынне з Найсвяцейшым Сакрамэнтам.
Эўхарыстычны цуд у вёсцы ў Гандурасе
«Мая першая думка была, што гэта Кроў Хрыста», — сказаў мужчына ў размове з EWTN Noticias і дадаў: «Я быў вельмі здзіўлены». Хасэ, моцна ўсхваляваны, завяршыў набажэнства і распавёў прысутным пра тое, што адбылося. Вернікі былі ўпэўненыя, што здарыўся цуд.
Праз дзень у капліцу з бліжэйшага мястэчка Сан-Хуан прыбыў ксёндз Марвін Сатэла і ксёндз Оскар Радрыгес. Абодва святары належаць да супольнасці місіянераў Найсвяцйешага Сэрца Езуса, якія з нядаўняга часу нясуць служэнне ў той мясцовасці. Пасля размовы са сведкамі цуду, яны забралі карпарал і даставілі яго да біскупа Вальтэра Гілена Сота. Іерарх вырашыў з асцярожнасцю паставіцца да гэтай справы.
«Я не вельмі схільны да наіўнай веры ў розныя рэчы. Логіка робіць нас разважлівымі, калі ідзе гаворка пра веру ў рэчы без іх аналізу», — прызнаўся біскуп Гілен.
Праз тры месяцы іерарх перадаў карпарал у медыцынскі цэнтр Санта-Роза-дэ-Капан. Аказалася, што ва ўстанове не было неабходнага абсталявання для правядзення аналізу, таму карпарал трапіў адтуль у таксікалагічны цэнтр DISA Test у сталіцы краіны Тэгусігальпе. Там тканіну вывучыў доктар хімічных навук і фармацэўт Эктар Дыяс-дэль-Валле.
Ашаламляльныя вынікі аналізу
Пад канец кастрычніка мінулага года карпарал даследаваў таксама эксперт па судовай медыцыне і эксперт па таксікалогіі. Яны выявілі, што кроў не належыць жывёле, не з’яўляецца штучнай і не з’яўляецца плямай расліннага паходжання. Эксперты таксама выключылі магчымасць забруджвання карпаралу плесняй ці грыбамі.
З аналізу вынікала, што пляма — гэта сапраўды кроў чалавека чацвёртай групы са станоўчым рэзусам (AB Rh+), або такой самай, якая была выяўлена падчас спраўджвання цуду ў Ланчана і на Турынскай плашчаніцы.
У ліпені — месяцы, які ў Касцёле традыцыйна прысвечаны асабліваму ўшанаванню Найдаражэйшай Крыві Хрыста, — біскуп Вальтэр Гілен Сота абвясціў вынікі аналізаў і прызнаў Эўхарыстычны цуд, які адбыўся ў вясковай капліцы ў Эль-Эспіналі.
Эўхарыстычны цуд — «цуд сінадальнасці»
«Я лічу, што гэты незвычайны, бачны, датыкальны, заўважны, пацверджаны знак праяву Крыві Пана ў малавядомай супольнасці на аддаленых вясковых абшарах нашага сельскага асяроддзя стаў вельмі вымоўным у наш час», — сказаў біскуп.
Іерарх таксама заўважыў, што цуд адбыўся толькі на вачах свецкага чалавека, і назваў гэтую падзею «цудам сінадальнасці».
«Гэта час свецкіх. Вера свецкіх людзей падтрымлівае жыццяздольнасць Касцёла ў гэтых куточках свету. Для мяне і для духавенства дыяцэзіі гэта заклік да навяртання, каб распазнаць Божы заклік у голасе свецкіх», — сцвердзіў біскуп Вальтэр Гілен Сота.
Хоць карпарал быў ужо дастаткова даследаваны, яго выслалі ў Ватыкан, дзе будзе зроблены канчатковы аналіз.
