14 верасня, у свята Узвышэння Святога Крыжа, пры францішканскім кляштары ў Івянцы (Мінска-Магілёўская архідыяцэзія, Валожынскі дэканат) адбылася сустрэча для фарматараў і ўдзельнікаў фармацыі Францішканскага ордэна свецкіх (ФОС).
Як паведамляецца на сайце парафіі святога Казіміра ў Маладзечне Pio.by, у сустрэчы ўзялі ўдзел каля паўсотні братоў і сясцёр з розных куткоў Беларусі.
Сустрэча распачалася са святой Імшы, цэлебрацыю якой узначаліў айцец Павел Раманчук OFMConv. Гамілію да членаў супольнасці прамовіў нацыянальны асістэнт ФОС у Беларусі брат Андрэй Букштан OFMCap. Ён падкрэсліў, што Крыж, узнесены над зямлёю, дадзены нам для радасці: каб мы адкрывалі прысутнасць Бога ў гэтым Крыжы; каб ведалі, што гэта момант нашага навяртання; каб у ім убачылі Бога, які прабачае, які ніколі нас не забівае, а заўсёды дае нам шанц на жыццё. Гэты шанц — у Яго Сыне Укрыжаваным.
Пасля Імшы айцец Яўген прамовіў да ўдзельнікаў сустрэчы канферэнцыю на тэму «Тры слупы пастаяннай фармацыі ў Францішкансцім ордэне свецкіх».
Святар патлумачыў, што фармацыя — гэта працэс паступовага ўдасканалення асобы да пэўнай формы.
\Узорам дасканаласці для кожнага хрысціяніна з’яўляецца Хрыстус. Хрысціянская фармацыя кіруе да Хрыста, каб стаць падобнымі да Яго, каб Яго ўбачыць і ісці за Ім.
Трыма слупамі, на якіх трымаецца францішканская фармацыя, з’яўляюцца супольнасць, Божае Слова і Літургія.
Айцец Яўген адзначыў, што францішканскі стыль фармацыі заключаецца ў выхаванні сябе ў пошуку Хрыста, жаданні жыць Евангеллем, быць адкрытым на патрэбы іншага чалавека і самае галоўнае — у асабістым навяртанні, якое з’яўляецца ключом францішканскай фармацыі.
Напрыканцы сустрэчы для ўсіх лакальных супольнасцяў ФОС была прапанаваная сістэма «інструментаў» для пастаяннай фармацыі ордэна свецкіх.
