29 мая адбылася сустрэча прадстаўнікоў душпастырства беларусаў Варшавы (Польшча) з кардыналам Казімірам Нычам, арцыбіскупам Мітрапалітам Варшаўскім.
Вернікі разам з душпастырамі распавялі пра развіццё супольнасці і выклікі, з якімі сутыкаюцца. Дэлегацыя ад імя беларусаў-католікаў Варшавы падзякавала арцыпастыру за падтрымку іх дзейнасці.
Кардынал Ныч, са свайго боку, запэўніў беларусаў у сваёй прыхільнасці ў развіцці іх душпастырства.
Супольнасць беларусаў-католікаў у Варшаве існуе ўжо шмат гадоў. З восені 2021 года святыя Імшы і сустрэчы набылі рэгулярны характар. На цяперашні момант штонядзелю ў капліцы касцёла святога Аляксандра на плошчы Трох Крыжоў адбываюцца дзве Імшы на беларускай мове: ў 11.30 і ў 18.00. Таксама душпастырства ладзіць катэхезы, культурныя мерапрыемствы, дабрачынныя акцыі.
