З 16 па 18 снежня ў Варшаве капуцын з Беларусі брат Алег Шэнда правёў рэкалекцыі на тэму: «Адказны, безадказны, гіперадказны. А як па-хрысціянску?»
Багатая праграма духоўных практыкаванняў уключала ў сябе штодзённую цэлебрацыю святой Імшы, адарацыю Найсвяцейшага Сакрамэнту з магчымасцю споведзі, ружанцовую малітву і канферэнцыі.
Брат Алег і ўдзельнікі рэкалекцый супольна шукалі адказы на пытанні: як распазнаць сферу сваёй адказнасці? што такое адказнасць для хрысціяніна? што рабіць з гіперадказнасцю і з абыякавасцю?
Капуцын звярнуўся да дзяцей падчас катэхэзы, у якой яны разам разважалі над цудам Божага Нараджэння.
Дадатковым пунктам сёлетніх рэкалекцый стаў дзень засяроджання, які таксама правёў брат Алег Шэнда. Удзельнікі разважалі над словам, паслухалі канферэнцыю і ўдзельнічалі ў Імшы.
На заканчэнне рэкалекцый удзельнікі памаліліся ў інтэнцыях Святога Айца.
