На пачатку Адвэнта адбылася чарговая пастырская сустрэча беларусаў каталіцкага веравызнання Масквы і рэгіёна.
Перад святой Імшой на беларускай мове, якую цэлебраваў айцец Пётр Карнелюк OFM Conv, адбылася адарацыя Найсвяцейшага Сакрамэнту.
Пасля набажэнства была арганізавана сустрэча вернікаў з душпастырам у Францішканскім цэнтры сталіцы суседняй краіны.
Беларусы-католікі пачулі ад святара разважанні аб некаторых найважнейшых аспектах Адвэнту, часу навяртання, і аб Валадарстве Пана. Закраналіся тэмы, ўласцівыя першай палове Адвэнту, якая прысвечана падрыхтоўцы да другога прыйсця Езуса Хрыста. Было адзначана, што Адвэнт — гэта час радаснага чакання прыйсця Збаўцы; час разважання і міласэрнасці; час духоўнай падрыхтоўкі да светлага свята Калядаў.
Перад пачаткам былі запалены дзве свечкі з адвэнтавага вянка: першая сімвалізуе прарокаў і з’яўляецца свечкай надзеі і чакання. Другая свечка — бэтлеэмская, сімвал любові Божай і нараджэння Пана ў чалавечых сэрцах.
