13 кастрычніка ў катэдры Саламанкі (Іспанія) была выстаўлена вельмі рэалістычная фігура зраненага цела Езуса Хрыста, выкананая на падставе выявы з Турынскай плашчаніцы, дакладная копія якой у натуральную велічыню захоўвалася ў Мінску ў Чырвоным касцёле.
На сайце dailystar.co.uk, паведамляецца, што на целе, зробленым з сілікона і латэкса з натуральнымі чалавечымі валасамі, прадстаўлены ўсе раны на целе Езуса Хрыста, нанесеныя яму падчас катаванняў і бічавання, а таксама ўкрыжавання, якія былі выяўлены ў працэсе даследвання Турынскай плашчаніцы.
Лічыцца, што славутая Турынская плашчаніца, першыя згадкі пра якую адносяцца да 1354 года, магла быць пахавальнай палатнінай, у якую было захінута знятае з крыжа зраненае цела Хрыста. Каталіцкі Касцёл афіцыйна не выказваецца наконт аўтэнтычнасці плашчаніцы, якую называюць каштоўнай «іконай крыжовай мукі і ўваскрасення Збаўцы».
Фігура вышынёю 178 см і вагою 75 кг стала плёнам шматгадовага вывучэння Турынскай плашчаніцы іспанскімі спецыялістамі.
На вельмі рэалістычным целе можна ўбачыць не толькі рубцы ад бічавання, але таксама раны ад цярнёвай кароны на галаве і ад дзіды, якой, паводле Евангелля, адзін з жаўнераў прабіў бок Укрыжаванаму Хрысту.
Біскуп Саламанкскі Хасэ Луіс Рэтана Ганзала кажа, што вобраз з Турынскай плашчаніцы ўяўляе сабой «ўвасабленне Божай любові, што ўцелаўляецца ў Езусе Хрысце, які памірае як злачынца, прыносячы сябе ў страшную ахвяру дзеля нашага збаўлення.
Няма ў свеце любові, большай за гэтую», — сцвярджае іерарх.
Куратар выставы Алваро Бланка кажа, што яна прадстаўляе 15 гадоў вывучэння Турынскай плашчаніцы. «Ніхто не наважваўся зрабіць настолькі рэалістычнае цела, як гэтае. Мы наважыліся і спадзяемся, што выстава будзе мець поўны поспех», — падкрэсліў куратар. Арганізатары праекту, які называецца «Таямнічы Чалавек», адзначаюць, што «гэта падарожжа ў мастацтва, археалогію і навуку аб Турынскай плашчаніцы, што ўпершыню прадстаўлены на гэтай выставе».
Выстава да снежня будзе дзейнічаць у Саламанцы, пасля чаго адправіцца ў турнэ па свеце.
