![](/3/images/news/2021/05/13288/2021-05-07-117963971_pro.jpg)
Новая статуя Хрыста, якая ўзводзіцца ў бразільскім горадзе Энкантаду, што на поўдні краіны, будзе на пяць метраў вышэй за знакамітую статую Хрыста Збаўцы ў Рыа-дэ-Жанэйра.
Як паведамляе interfax.ru са спасылкай на сайт BBC News, вышыня манумента будзе складаць 43 метры. Такім чынам, яна стане трэцяй па вышыні статуяй Езуса ў свеце, саступаючы помнікам на выспе Сулавесі ў Інданезіі (52,55 м) і ў Свебодзіне ў Польшчы (52,5 м).
Усярэдзіне скульптурнага збудавання прадугледжаны ліфт, у якім наведвальнікі змогуць падняцца на назіральную пляцоўку на вышыні 40 метраў.
Будаўніцтва манумента распачалося ў 2019 годзе. Ідэя належыць мэру горада Адраальду Канзаці, які памёр у сакавіку ад Covid-19.
Чакаецца, што праект будзе завершаны ў гэтым годзе. Будаўнічымі працамі кіруе Асацыяцыя сяброў Хрыста разам з сынам былога мэра.
Праект фінансуецца за ахвяраванні прыватных асоб і кампаній.