У сераду 9 сакавіка Закарпацце наведаў кардынал Мйкл Чэрны, кіраўнік ватыканскай Дыкастэрыі па служэнні інтэгральнаму развіццю чалавека, які разам з Папскім элемазінарыем кардыналам Конрадам Краеўскім з’яўляецца спецыяльным пасланнікам Папы Францішка ва Украіне, што перажывае трагедыю вайны.
Як паведамілі на сайце Мукачаўскай рыма-каталіцкай дыяцэзіі munkacs-diocese.org, кардынал Чэрны, які выконвае заданне дабрачыннай дапамогі ахвярам вайны ва Украіне, сустрэўся з біскупамі і духавенствам Закарпацця, а таксама з прадстаўнікамі ўлады.
Удзел у сустрэчы ўзяў таксама Апостальскі адміністратар Мукачаўскай дыяцэзіі біскуп Мікола Лучок ОР і дырэктар Caritas-Spes Украіна айцец Пятро Жаркоўскі.
Кардынал Чэрны перадаў благаслаўленне ад Святога Айца і запэўніў:
«Украіну падтрымлівае ўвесь хрысціянскі свет і моліцца аб спыненні вайны».
Украінскія іерархі і прадстаўнікі супольнасцяў падзяліліся з пасланнікам Пантыфіка ўласным досведам: як балючым, звязаным з вайною, так і сілаю ўзаемадапамогі, якая адчуваецца на ўсіх узроўнях. Біскупы звярнуліся да кардынала Чэрны з просьбаю, каб Папа Францішак таксама трывала рабіў усё, што ад яго залежыць, для спынення гэтай вайны.
