У нядзелю 20 лютага дапаможны біскуп Варшаўскай архідыяцэзіі Міхал Яноха сустрэўся з беларускай каталіцкай супольнасцю, якая збіраецца на супольныя малітвы пры парафіі святога Аляксандра ў Варшаве.
На сустрэчы з удзельнікамі душпастырства беларусаў у сталіцы Польшчы іерарх скіраваў да іх словы гасціннасці і падтрымкі:
«Хачу вам сказаць, каб вы адчувалі сябе як дома. Трымайцеся Бога і трымайцеся разам». Беларусы ў сваю чаргу падзякавалі біскупу і ўсяму Касцёлу ў Польшчы за магчымасць удзелу ў святой Імшы на роднай мове.
Пасля кароткай сустрэчы адбылася Эўхарыстыя, якую цэлебравалі святары, адказныя за душпастырства нашых суайчыннікаў у польскай сталіцы. На Імшы прысутнічаў таксама ксёндз Міраслаў Яворскі, пробашч парафіі святога Аляксанда ў Варшаве, дзе моляцца тутэйшыя беларусы.
Гамілію прамовіў біскуп Яноха. Іерарх, грунтуючыся на словах Езуса з нядзельнага Евангелля пра любоў да ворагаў, заахвоціў удзельнікаў Эўхарыстыі вучыцца іх выконваць, прывёўшы шмат прыкладаў прабачэння з уласнага досведу і з гісторыі дзвюх краін.
«Сіла і гвалт заўсёды з’яўляюцца доказам страху, і яны мінаюць. А вера, любоў і прабачэнне застаюцца», — сцвердзіў біскуп Міхал Яноха.
На заканчэнне Эўхарыстыі ён удзяліў удзельнікам пастырскае благаслаўленне.
