Юбілейны 25-ы кангрэс Renovabis сёлета пройдзе ў Берліне пад дэвізам «„Каб усе былі адно“. Экуменізм у Цэнтральнай і Усходняй Еўропе — заданне і ўзбагачэнне». Хрысціянскі форум запланаваны на 15 і 16 верасня.
Форум абяцае стаць пляцоўкай для дыялогу паміж католікамі, праваслаўнымі і пратэстантамі. Так, адной з тэмаў стане дзейнасць Касцёла ва ўмовах пандэміі (душпастырства, катэхезы, святая Імша) і тое, як Касцёлы пераадольваюць гэтыя выклікі.
Сярод іншых тэм кангрэса — напружанасць ва ўзаемаадносінах паміж канфесіямі на прыкладах Румыніі і Украіны.
Арганізатары форума адзначаюць, што кангрэс не зможа даць адказы на ўсе пастаўленыя пытанні, але забяспечыць дыялог і абмен думкамі.
Сёлета кангрэс пройдзе ў гібрыднай форме: анлайн і часткова — з дакладамі запрошаных экспертаў у Каталіцкай Акадэміі ў Берліне.
Даведка
Міжнародны кангрэс Renovabis упершыню быў праведзены ў 1997 годзе аднайменнай арганізацыяй дапамогі нямецкіх католікаў краінам Цэнтральнай і Усходняй Еўропы. Кангрэс служыць пляцоўкай для дыскусіі пра развіццё Касцёла і грамадства на усходзе Еўропы.
