У суботу 14 жніўня Дзяржаўны сакратар Яго Святасці Папы Францішка кардынал П’етро Паралін удзеліць біскупскае пасвячэнне монсіньёру Вісвальдасу Кульбокасу, прызначанаму нядаўна Апостальскім нунцыем ва Украіне.
Урачыстасць пасвячэння пройдзе ў архікатэдральнай базыліцы святога Станіслава і святога Уладзіслава ў Вільні.
Пачатак а 12-й гадзіне.
Вісвальдас Кульбокас нарадзіўся ў Клайпедзе 14 мая 1974 года. Дыпламатычную службу пры Святым Пасадзе распачаў у ліпені 2004 года. Служыў у ватыканскіх прадстаўніцтвах у Ліване, Нідэрландах, Расіі, а таксама працаваў у аддзеле сувязяў з дзяржавамі Дзяржсакаратарыяту Святога Пасаду і ў Кеніі.
Новапрызначаны Апостальскі нунцый валодае італьянскай, французскай, іспанскай, англійскай і расейскай мовамі.
Быў перакладчыкам на сустрэчах Папы Францішка з прэзідэнтам Пуціным і з Маскоўскім Патрыярхам Кірылам, а таксама наведаў Беларусь падчас візіту ў нашу краіну Дзяржаўнага Сакратара Яго Святасці Папы Францішка кардынала П’етро Параліна.
Вісвальдас Кульбокас становіцца шостым Апостальскім нунцыем ва Украіне, якая ўсталявала дыпламатычныя адносіны са Святым Пасадам 8 лютага 1992 года.
