З нагоды падрыхтоўкі да візіту Папы Францішка ў Славакію, запланаванага на 12–15 верасня, славацкая Канферэнцыя біскупаў адкрыла афіцыйны сайт, прысвечаны гэтай падзеі.
На рэсурсе navstevapapeza.sk можна атрымаць інфармацыю аб 34-м замежным Апостальскім падарожжы Святога Айца, якое ён мае намер здзейсніць у Венгрыю і Славакію.
Ужо цяпер на сайце, даступным пакуль толькі на славацкай мове, размешчана праграма, лагатып, дэвіз візіту і кантактная інфармацыя.
На ім паступова будуць публікавацца розныя матэрыялы, звязаныя з візітам, умовы ўдзелу (з’явяцца на пачатку жніўня), акрэдытацыі для журналістаў і іншыя падрабязнасці аб пілігрымцы.
Плануецца, што Святы Айцец правядзе чатыры дні ў Славакіі і наведае Браціславу, Прэшаў, Кошыцы і Шашцін-Стражэ.
Дэвіз 34-га Апостальскага падарожжа Папы Францішка — «З Марыяй і Юзафам на шляху да Езуса».
Як са спасылкай на арганізатараў візіту паведаміла Беларуская рэдакцыя парталу Vatican News, гэты дэвіз выражае спадзяванне на тое, што візіт Папы ў Славакію ўмацуе веру і адновіць жаданне ісці за Езусам, Які «не для таго прыйшоў, каб Яму служылі, але каб служыць» (Мц 20, 28), — заўважылі арганізатары.
На лагатыпе падарожжа змешчана дарога да крыжа, які знаходзіцца ў самым сэрцы, што з’яўляецца сімвалам любові да Езуса, святога Юзафа і Найсвяцейшай Панны Марыі — Нябеснай заступніцы Славакіі. Блакітны крыж увянчаны арэолам жоўтай стужкі і сямю чырвонымі шасціпраменнымі зоркамі, што паказваюць на адзін з тытулаў, якім мясцовыя жыхары ўшаноўваюць Маці Божую: «Багародзіца сямі боляў». Колеры ўзятыя са сцягоў Ватыкана і Славакіі.
