У нядзелю 4 ліпеня пасля традыцыйнай малітвы «Анёл Панскі» Папа Францішак абвясціў, што ў верасні мае намер наведаць Венгрыю і Славакію.
«Я з радасцю паведамляю, што з 12 па 15 верасня гэтага года, калі дасць Бог, скіруюся ў Будапешт, а потым у Славакію.
У сталіцы Венгрыі пройдзе ўрачыстасць заканчэння Міжнароднага Эўхарыстычнага кангрэсу, а потым адбудзецца мой візіт у Славакію. Сардэчна дзякую ўсім, хто рыхтуе гэтае падарожжа, і малюся за іх», — сказаў Святы Айцец, словы якога перадае Каталіцкае інфармацыйнае агенцтва КАІ.
Прэс-служба Святога Пасаду падала інфармацыю, што Папа Францішак 12 верасня возьмі ўдзел у святой Імшы на заканчэнне 52-а Міжнароднага Эўхарыстычнага кангрэсу ў Будапешце. Папа прыбудзе ў сталіцу Венгрыі па запрашэнні дзяржаўных уладаў і тутэйшай Канферэнцыі біскупаў. Кіраўнік ватыканскай прэс-службы Матэо Бруні паведаміў, што потым, з 12 па 15 верасня, Святы Айцец скіруецца з візітам у Славакію, дзе наведае Браціславу, Прэшаў, Кошыцы і Шашцін-Стражэ. Дакладная праграма візіту будзе абнародавана ў бліжэйшы час.
Пакуль Ян Павел ІІ — адзіны папа, які наведваў Венгрыю (у 1991 і 1996 гадах). Ён таксмама павбываў у Славакіі ў 1990 годзе (тады яшчэ ў складзе Чэхаславакіі), а таксама ў 1995 і 2003 гадах.
Вестка пра планаваны візіт Папы Францішка была з энтузіязмам і радасцю ўспрынятая ў Венгрыі і Славакіі.
«Каталіцкая супольнасць вернікаў чакае прыезду Святога Айца з вялікай радасцю і ўзнёслымі пачуццямі. Мы молімся, каб яго візіт стаў для нас знакам надзеі і новым пачаткам пасля заканчэння пандэмічнага становішча», — сказаў Прымас Венгрыі кардынал Петэр Эрдзё, словы якога падае КАІ.
Венгерскі іерарх падкрэсліў значэнне асабістага ўдзелу Святога Айца ў заканчэнні 52-а Міжнароднага Эўхарыстычнага кангрэсу, паколькі зазвычай Папу на ім прадстаўляюць яго спецыяльныя пасланнікі — легаты. Апошні раз Папа асабіста прысутнічаў на такой падзеі 21 год таму: тады Ян Павел ІІ удзельнічаў у Эўхарыстычным кангрэсе, які праходзіў у Рыме.
Духоўна падрыхтавацца да папскага візіту заклікаў вернікаў сваёй краіны Старшыня Канферэнцыі біскупаў Славакіі арцыбіскуп Браціслаўскі Станіслаў Зваленскі.
«Гэта надзвычай радасная вестка, я вельмі ўсцешаны. Думаю, што многія з нас у гэтую хвіліну з вялікай радасцю вяртаюцца памяццю да візіту Святога Айца Яна Паўла ІІ.
Мы зноў можам сказаць, што наступнік апосталаў цяперашні Папа Францішак прыедзе ў Славакію. Гэтая вестка прыходзіць таксама ў сувязі з урачыстасцю нашых святых евангелізатараў Кірыла і Мятода [у Славакіі і Чэхіі адзначаецца 5 ліпеня — заўв. КАІ]. Менавіта яны навучылі нас паважаць Папу. Цяпер мы зможам зноў прывітаць наступніка апостала Пятра ў Славакіі, прыняць яго сярод нас.
Я прашу ўсіх распачаць духоўную падрыхтоўку, каб мы сапраўды маглі пачуць пасланне Папы Францішка.
Гэта пасланне адкрытасці на тых, хто церпіць, хто знаходзіцца на ўзбоччы грамадства, хто знаходзіцца ў той ці іншай матэрыяльнай або духоўнай патрэбе. Акрамя таго, гэта вялікі клопат пра дабро сям’і, вялікая ўвага да патрэбаў моладзі. Гэтыя тэмы дакладна знойдуць месца падчас візіту Папы Францішка ў Славакію. Я лічу, што ў гэтай сферы мы можам спадзявацца на вялікае духоўнае ўмацаванне», — сказаў славацкі іерарх, якога цытуе КАІ.
