![](/3/images/news/2021/03/13004/2021-03-11-_112078231_gettyimages-172246108.jpg)
Каталіцкія біскупы Ірландыі звярнуліся да ўраду краіны з просьбай паслабіць абмежаванні для Касцёла, уведзеныя з прычыны каранавіруснай пандэміі. Як і ў мінулым годзе, католікі Ірландыі не маюць дазволу прыйсці ў касцёл на Вялікдзень.
«Асабліва балюча для хрысціянаў быць пазбаўленымі, вось ужо другі год запар, магчымасці публічна выказаць сваю веру падчас Вялікага тыдня і Вялікадня», — прыводзіць словы біскупаў руская рэдакцыя партала Vatican News.
Акрамя гэтага, у Ірландыі ўведзены абмежаванні адносна правядзення жалобных абрадаў, у якіх могуць удзельнічаць не больш за дзесяць чалавек. Як адзначаюць у сваім звароце ірландскія біскупы, гэта толькі павялічвае пакуты сем’яў, якія перажываюць жалобу.
У перыяд пандэміі, як сцвярджаюць іерархі, Касцёл заўсёды клапаціўся пра супольнае дабро і ахову здароўя і жыцця. «Мы згодныя, — пішуць біскупы, — жорсткія абмежаванні пры наяўнасці цяжкой пагрозы грамадскаму здароўю неабходныя. Аднак падобныя абмежаванні асабістай свабоды павінны быць прапарцыйнымі і кароткачасовымі».
Ірландскія біскупы звяртаюць увагу на неабходнасць улічваць ментальны, духоўны і эмацыйны дабрабыт грамадзянаў.
Іерархі заклікаюць паслабіць каранцінныя меры і даць дазвол на цэлебрацыю набажэнстваў з удзелам вернікаў, а таксама на ўдзел большай колькасці людзей у пахавальных абрадах. На думку іерархаў, гэта стане крыніцай надзеі і суцяшэння для многіх людзей і супольнасцяў.