10 лютага прайшла сустрэча Камісіі Каталіцкага выхавання Канферэнцыі Біскупаў Польшчы, прысвечаная катэхізацыі на базе школ. Ужо 30 гадоў урокі рэлігіі ўключаны ў школьную праграму.
«Калі будзе адкрытасць, якасць, зычлівасць і дабро, то гэтым мы будзем прыцягваць. Бо якія іншыя прылады? Прымусам, без сумневаў, няшмат дасягнем», — сцвердзіў на сустрэчы старшыня камісіі біскуп Войцех Осял, словы якога прыводзіць партал ekai.pl.
Як адзначыў іерарх, з усёй Польшчы ідуць сігналы пра тое, што моладзь усё часцей адмаўляецца ад урокаў па рэлігіі.
«Аднак, з іншага боку, трэба таксама заўважыць, што вялікая частка моладзі прысутнічае на гэтых уроках, — працягваў біскуп Осял. — Праблемы трэба ўздымаць і вырашаць, аднак трэба бачыць і дабро, якое таксама існуе. Можа, яно больш ціхае, але яно ёсць. Таму варта паглядзець сумленна і пазітыўна».
«Урок рэлігіі разам з каштоўнасцямі, з верай упісваецца ў інтэгральнае выхаванне, якое так патрэбна ў чалавечым і духоўным вымярэнні. Гэта таксама трэба ведаць», — падкрэсліў іерарх.
Пры гэтым старшыня камісіі адзначыў, што праблема адмаўлення моладзі ад урокаў рэлігіі таксама мае вырашэнне, і яго трэба шукаць.
Непакоячай з’явай, на думку ірарха, з’яўляецца змяншэнне колькасці выкладчыкаў рэлігіі. На змену настаўнікам, якія сыходзяць на пенсію, маладых прыходзіць недастаткова.
«У моладзі ёсць такая тэндэнцыя: калі яна чагосьці не абавязана рабіць, то і не будзе, — сцвердзіў біскуп Осял. — Нашае заданне — паказаць маладым прыгажосць быцця ў Касцёле, хоць мы ведаем, што рэпутацыя Касцёла сёння моцна падарвана».
