9 мая ў сіцылійскім Агрыджэнта Папа Францішак узначаліць цырымонію беатыфікацыі суддзі Разарыё Ліваціно, забітага ў 1990 годзе за барацьбу з арганізаванай мафіяй. У канцы студзеня Пантыфік ухваліў дэкрэт аб мучаніцкай смерці Ліваціно.
Кардынал Франчэско Мантэнэгро, які з’яўляецца арцыбіскупам Агрыджэнта, паведаміў, што дата беатыфікацыі звязана з візітам Папы Яна Паўла ІІ, які 9 мая 1993 г. у гэтым сіцылійскім горадзе прамовіў гістарычныя словы, пагражаючы мафіі судом Божым. Пра гэта паведамляе інфармацыйнае агенцтва КАІ.
Ян Павел ІІ назваў Ліваціно «мучанікам за справядлівасць, а ўскосна і за веру». Вялікі Папа наведаў тады бацькоў забітага і размаўляў пра яго мучаніцкую смерць.
Разарыё Ліваціно (1952-1990) з 1989 года працаваў суддзёю ў пракуратуры Агрыджэнта, і 21 верасня 1990 года быў забіты членамі злачыннай групіроўкі Stidda.
