29 студзеня ў ЗША праходзіць традыцыйны марш у абарону жыцця, за ўдзел у якім можна атрымаць поўны адпуст.
Такую магчымасць Папа Францішак дае ўсім удзельнікам маршу, у тым ліку і тым, якія возьмуць у ім удзел віртуальна. Адпуст быў першапачаткова ўдзелены 13 студзеня Папскім элемазінарыем кардыналам Маўро П’ячэнцай, яшчэ да таго, як стала вядома, што марш пройдзе віртуальна.
«Марш за жыццё» — гэта мірны пратэст супраць абортаў, які традыцыйна збірае вялікую колькасць удзельнікаў па ўіх Злучаных Штатах і сёлета пройдзе ўжо ў 48-ы раз.
Як перадае Каталіцкае інфармацыйнае агенцтва CNA, 15 студзеня арганізатары сёлетняга маршу ў абарону жыцця абвясцілі, што ў гэтым годзе з-за пандэміі каранавірусу акцыя пройдзе ў віртуальным фармаце.
Кіраўніца маршу Джын Манчыні паведаміла журналістам, што на акцыю збярэцца абмежаваная колькасць актыўных абаронцаў жыцця, якія будуць прадстаўляць увесь рух. Яны прынясуць да будынку Вярхоўнага суду ЗША ружы ў памяць пра ўсіх ненароджаных, забітых у выніку аборту. Усе ахвотныя амерыканцы змогуць назіраць за маршам і віртуальна далучыцца да яго на адмысловай інтэрнэт-старонцы.
«Марш за жыццё», які арганізатары называюць найбольшай у свеце акцыяй у абарону правоў чалавека, штогод праводзіцца ў Вашынгтоне 22 студзеня або ў адзін з бліжэйшых дзён, што прымеркавана да прынятага Вярхоўным судом ЗША ў 1973 годзе рашэння легалізаваць аборты ў краіне.
У ноч перад маршам у базыліцы Беззаганага Зачацця ў Вашынгтоне адбываецца нацыянальнае малітоўнае чуванне. Сёлета яно прайшло ў чацвер з абмежаваннямі, абумоўленымі складанай эпідэміялагічнай сітуацыяй.
Для атрымання поўнага адпусту за ўдзел у «Маршы за жыццё» неабходна выканаць звычайныя ўмовы:
- прыняць святую Камунію
- памаліцца «Ойча наш» і «Веру»
- памаліцца ў інтэнцыях Святога Айца, прачытаўшы пэўную малітву (напрыклад, «Вітай, Марыя» або «Тваёй абароне»)
- не мець прывязанасці да ніякага, нават лёгкага, граху
