Пастаянная рада Канферэнцыі Біскупаў Францыі пастанавіла правесці медыцынскае абследаванне святароў у сувязі з занепакоенасцю станам іх здароўя.
Як паведаміла Каталіцкае інфармацыйнае агенцтва КАІ, епіскапатам было даручана вывучыць прычыны пагаршэння стану здароўя французскага духавенства: эмацыянальную напружанасць, самотнасць, перапрацоўку, на якія накладаецца таксама шырокі рэзананс педафільскіх скандалаў ва ўлонні Касцёла. З гэтай мэтай была створана працоўная група, у склад якой увайшлі дыяцэзіяльныя святары, біскуп і шэраг экспертаў.
Яны плануюць заняцца рознымі аспектамі жыцця духавенства: душпастырскай працай, станам псіхічнага і фізічнага здароўя, сацыяльным забеспячэннем і г.д.
Паводле дадзеных за 2017 г., у Касцёле ў Францыі было 11 тыс. 314 дыяцэзіяльных святароў. Для параўнання, у 1965 г. іх колькасць складала 49 тыс., а з 1980 г. яна зменшылася на 70 працэнтаў.
Цяпер некаторыя функцыі святароў прымаюць на сябе свецкія, якія займаюцца катэхізацыяй, падрыхтоўкай да сакрамэнтаў, адказваюць за фінансавыя справы, вядуць парафіяльныя кнігі і праводзяць пахаванні.
