Вашынгтонская архідыяцэзія ў сваім акаўнце ў Twitter піша, што яе арцыбіскуп Уілтан Грэгары будзе першым афраамерыканскім кардыналам у Злучаных Штатах Амерыкі.
Пра гэта паведамляе Каталіцкае інфармацыйнае агенцтва КАІ. 73-гадовы іерарх увайшоў у лік 13 новых кардыналаў, якім Папа Францішак уручыць кардынальскія берэты 28 лістапада ў Ватыкане.
«З удзячным і пакорным сэрцам дзякую Папу Францішку за гэтае прызначэнне, якое дазволіць мне працаваць бліжэй да яго ў клопаце аб Хрыстовым Касцёле»,
— напісаў намінат.
У сваю чаргу старшыня епіскапату ЗША арцыбіскуп Хасэ Гомес, які мае лацінаамерыканскае паходжанне, назваў узвядзенне арцыбіскупа Грэгары ў кардынальскую годнасць «моцным знакам надзеі і ўключэння ў Касцёле ў ЗША». «Прызначэнне першага афраамерыканскага кардынала ў Злучаных Штатах дае нам нагоду спыніцца і падзякаваць за шматлікія дары, якія афраамерыканцы прынеслі Касцёлу», — напісаў іерарх.
