Запланаванае на 25–27 верасня ў Празе пленарнае пасяджэнне Рады Канферэнцый Біскупаў Еўропы (РКБЕ) было адменена. Замест яго кіраўнікі еўрапейскіх епіскапатаў сустрэнуцца ў рэжыме анлайн-канферэнцыі.
У апублікаваным 17 верасня на партале РКБЕ паведамленні сказана, што рост штодзённых выпадкаў заражэння вірусам COVID-19 моцна ўскладняе прыезд удзельнікаў пасяджэння ў чэшскую сталіцу. Гэта звязана з тым, што ў многіх еўрапейскіх краінах зноў уводзяцца карантынныя абмежаванні ў адносінах да тых, хто вяртаецца з Чэхіі, а многія авіякампаніі адмяняюць палёты ў Прагу.
Узяўшы пад увагу санітарныя захады мясцовых уладаў, а таксама пасля кансультацыі з Канферэнцыяй Каталіцкіх Біскупаў Чэхіі і Пражскай архідыяцэзіяй, Прэзідыум РКБЕ палічыў мэтазгодным адмяніць сустрэчу ў раней прызначаны тэрмін і запрасіць усіх членаў Рады ўзяць удзел у пленарным пасяджэнні ў форме анлайн-канферэнцыі, якая пройдзе 25–26 верасня ў адпаведнасці з пададзенай праграмай.
Сустрэча РКБЕ у новым фармаце будзе прысвечана раней вызначанай тэме «Касцёл у Еўропе пасля пандэміі».
Пасяджэнне распачнецца 25 верасня ў 16.00 па сярэднееўрапейскім часе. Пасля прачытання паслання ад Папы Францішка з прывітальным словам да ўдзельнікаў звернецца прэфект Кангрэгацыі па справах Біскупаў кардынал Марк Уэлле, а Старшыня РКБЕ кардынал Анджэло Баньяска зробіць уводзіны ў тэматыку пасяджэння.
Яно будзе складацца з трох працоўных сесій і завершыцца ў суботу ўвечары супольнай малітвай удзельнікаў.
Тры гады таму па запрашэнні Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча месцам сустрэчы РКБЕ стаў Мінск.
