Па інфармацыі міжнароднай арганізацыі Open Doors, якая займаецца даследаваннем сітуацыі хрысціян у свеце, у некаторых краінах Азіі, дзе пераважае будысцкае насельніцтва, узмацняецца хрысціянскі астракізм, усё часцей здараюцца выпадкі адкрытага пераследу.
Як паведамляе польская рэдакцыя парталу Vatican News, арганізацыя адзначае, што сітуацыя хрысціян пагаршаецца ў такіх краінах, як Лаос, М’янма, Бутан і Шры-Ланка.
Найбольш распаўсюджаным з абвінавачванняў у адрас хрысціян з’яўляецца тое, што яны шкодзяць грамадскай гармоніі і знішчаюць культуру дадзенай краіны.
Наступствам гэтага, як кажа пастар з Бутана, які супрацоўнічае з Open Doors, становіцца высяленне хрысціянскіх сем’яў з вёсак, дзе сярод насельніцтва пераважаюць будысты, каб хрысціянскія звычаі не раздражнялі іх бостваў. У краінах, дзе ўмацоўваецца будысцкі нацыяналізм, вызнаўцы Хрыста ўспрымаюцца як знішчальнікі народнай ідэнтычнасці і культуры.
Адзначаецца, што ўсё гэта ўплывае на штодзённае жыццё хрысціян, іх маргіналізуюць і выключаюць з лакальнага грамадства. Дыскрымінацыя праяўляецца, між іншым, у тым, што будысты не хочуць купляць у хрысціян, напрыклад, драўнінны вугаль ці дровы. «Калі мы не прададзім гэтых прадуктаў, у нас не будзе грошай, каб купіць рыс і ўтрымліваць сем’і», — кажа пастар з М’янмы.
Па яго словах, у асабліва цяжкай сітуацыі знаходзяцца былыя будысты, якія навярнуліся ў хрысціянства.
«Бывае, што іх арыштоўваюць і ім пагражаюць улады, уласныя сем’і іх адштурхоўваюць, з імі разрываюць усе кантакты, а таксама сем’і пазбаўляюць сваіх дзяцей, якія навярнуліся ў хрысціянства, спадчыны», — дадае пастар.
Нягледзячы на гэтыя цяжкасці, Касцёл у Лаосе, М’янме, Бутане і Шры-Ланцы працягвае існаваць і расці, уносячы евангельскае пасланне ў будысцкі свет.
