24 жніўня на ўрачыстасцях з нагоды Дня незалежнасці Украіны Апостальскі нунцый Клаўдыё Гуджэроцці атрымаў з рук прэзідэнта Уладзіміра Зяленскага ордэн «За заслугі» ІІІ ступені.
Пра гэта са спасылкаю на RISU паведамляе партал Сredo.pro.
Нагадаем, што арцыбіскуп Клаўдыё Гуджэроцці, які з 2011 па 2015 год быў Апостальскім нунцыем у Беларусі, а з 2015 года — прадстаўніком Папы Францішка ва Украіне, завяршае сваю місію ў гэтай краіне ў сувязі з яго прызначэннем Апостальскім нунцыем у Вялікабрытаніі.
Як адзначае Сredo.pro, на працягу свайго амаль пяцігадовага служэння ва Украіне Апостальскі нунцый Клаўдыё Гуджэроцці стаў увасабленнем асаблівай блізкасці Папы Францішка да людзей, якія пражываюць на акупаваных тэрыторыях і ў прыфрантавой зоне.
Ордэн «За заслугі» — дзяржаўная ўзнагарода Украіны для адзначэння выдатных заслуг грамадзянаў у эканамічнай, навуковай, сацыяльна-культурнай, вайсковай, дзяржаўнай, грамадскай і іншых сферах супольнай дзейнасці. Ордэнам «За заслугі» ІІІ ступені ўзнагароджваюцца супрацоўнікі пасольстваў іншаземных дзяржаў ва Украіне, вядомыя дзяржаўныя, палітычныя, грамадскія дзеячы, мастакі, навукоўцы, бізнэсмены і іншыя асобы.
