4 ліпеня Папа Францішак прызначыў арцыбіскупа Клаўдыё Гуджэроцці Апостальскім нунцыем у Вялікабрытаніі. З 2015 года іерарх выконваў дыпламатычную місію ва Украіне.
Пра гэта паведамляе беларуская рэдакцыя парталу Vatican News.
Арцыбіскуп Клаўдыё Гуджэроцці нарадзіўся 7 кастрычніка 1955 г. у італьянскай Вероне. Cкончыў факультэт Усходніх моваў і літаратуры Венецыянскага дзяржаўнага ўніверсітэта Cà Foscari, атрымаў вучоную ступень магістра святой літургіі ў Папскім літургічным інстытуце св. Анзэльма ў Рыме, абараніў дактарат у Папскім Усходнім iнстытуце.
Прэзбітэрскае пасвячэнне атрымаў 29 мая 1982 г. У 1985 г. паступіў на служэнне ў Кангрэгацыю па справах Усходніх Касцёлаў. 7 снежня 2001 г. быў прызначаны Апостальскім нунцыем у Арменіі і Грузіі, 13 снежня таго ж года – у Азербайджане.
6 студзеня 2002 г. атрымаў біскупскую сакру. З’яўляецца тытулярным арцыбіскупам Равэлы.
З 15 ліпеня 2011 г. па 13 лістапада 2015 г. быў Апостальскім нунцыем у Беларусі, затым, на працягу амаль пяці гадоў, – ва Украіне.
