У касцёле Маці Божай Балеснай ў іспанскай сталіцы вядуцца пошукі месца пахавання Педра Кальдэрона дэ ла Баркі — драматурга і паэта перыяду Залатога веку іспанскай літаратуры.
Каманда даследчыкаў, у якую ўваходзяць археолагі, гісторыкі, фізікі і генетыкі, спрабуе высветліць, дзе знаходзяцца парэшткі драматурга, пахаванага ў касцёле, які моцна пацярпеў падчас грамадзянскай вайны ў Іспаніі і быў адноўлены ў 40-я гады мінулага стагоддзя.
Як са спасылкай на ўдзельнікаў даследчых прац паведамляе Каталіцкае інфармацыйнае агенцтва КАІ, пошукі плануецца весці на ўсёй тэрыторыі святыні. Паводле сведчанняў памерлага ў сярэдзіне ХХ стагоддзя законніка, цела Педра Кальдэрона было замуравана ў адной са сцен касцёла. Аднак відавочца перад смерцю не ўдакладніў месца, дзе знаходзяцца парэшткі славутага драматурга.
«Для таго, каб яго знайсці, мы выкарыстоўваем розныя тэхналогіі <…>, якія дазволяць нам скласці поўны план касцёла»,
— патлумачыў Хорхэ Марын дэ Паблас, археолаг, які бярэ ўдзел у пошуках.
Педра Кальдэрон дэ ла Барка (1600–1681 гг.) вядомы перадусім як аўтар дзвюх тэатральных п’ес: «Жыццё ёсць сон» (La vida es sueño) і «Вялікі тэатр свету» (El gran teatro del mundo).
