Кіраўнік праектаў асацыяцыі Pro Terra Sancta, якая аказвае падтрымку Кустодыі Святой Зямлі, Вінчэнцо Белома распавёў пра вельмі цяжкі крызіс — перш за ўсё ў Палестыне, — выкліканы спыненнем пілігрымак у сувязі з «другой хваляй» COVID-19, што пачалася ў канцы чэрвеня.
Як паведамляе руская рэдакцыя парталу Vatican News, больш за ўсё ад эканамічных праблем пакутуюць хрысціянскія сем’і Бэтлеема, матэрыяльнае становішча якіх залежыць ад рэлігійнага турызму. Усеагульная трывога з-за небяспекі захворвання, паглыбленая адсутнасцю нармальнай аховы здароўя і сацыяльнай дапамогі, прывяла да сур’ёзнага крызісу эканомікі і занятасці.
У Ізраілі штодзённа выяўляюць каля дзвюх тысяч носьбітаў вірусу, у Палестыне — каля 600, адзначыў Белома ў размове з Vatican News.
Ён дадаў, што Палестына перажывае санітарны крызіс не толькі ў часы каранавірусу, — хоць у апошнія месяцы Палестынская нацыянальная адміністрацыя прыняла ўзмоцненыя меры па стрымліванні вірусу, арганізаваўшы некалькі шпітальных структур. У Бэтлееме таксама было падрыхтавана аддзяленне для хворых на каранавірус.
Кіраўнік праектаў асацыяцыі Pro Terra Sancta звярнуў увагу, што ў Палестыне не існуе ніякага сацыяльнага страхавання і сістэмы дзяржаўнай дапамогі, таму дапамога родных з’яўляецца адзінай магчымасцю для пераадолення гэтага перыяду. Многія сем’і інвеставалі ў рэлігійны турызм, узяўшы крэдыт, і апынуліся практычна ў безвыходнай сітуацыі.
Кажучы пра святыні, прадстаўнік асацыяцыі адзначыў, што «афіцыйна яны зачынены», але на працягу тыдня хрысціяне могуць заходзіць у святыні, якія зачынены па суботах і нядзелях.
Pro Terra Sancta стараецца дапамагчы насельніцтву праз праект «Дом Трох Каралёў» — першы цэнтр занятасці ў Палестыне.
Як распавёў Белома, праект пакліканы перш за ўсё дапамагчы мясцовай моладзі: сярод усіх арабскіх краін Палестына знаходзіцца на першым месцы па ментальных расстройствах і дэпрэсіях у моладзі, і гэта звязана з сітуацыяй канфлікту.
