![](/3/images/news/2020/07/2020-07-28-papa.jpg)
Дапаможны біскуп Львоўскай архідыяцэзіі Эдвард Кава распавёў пра вынікі дабрачыннай акцыі «Папа для Украіны», якая пачалася па ініцыятыве Святога Пасаду ў 2016 годзе і праводзілася ў супрацоўніцтве з украінскімі каталіцкімі арганізацыямі з удзелам іншых канфесій.
Як паведамляе руская рэдакцыя парталу Vatican News, Папа Францішак даручыў ажыццяўленне праекту ватыканскаму Дэпартаменту служэння поўнаму развіццю чалавека, а ва Украіне яго рэалізацыяй кіравала Апостальская нунцыятура: спачатку праз спецыяльны тэхнічны камітэт, які дзейнічаў у Запарожжы, затым праз тэхнічны сакратарыят, які базуецца ў Кіеве.
Перш за ўсё выдзеленыя сродкі — 15 мільёнаў еўра — паслужылі бедным, дзецям, якія перажылі звязаны з вайной стрэс, шматдзетным сем'ям, пажылым людзям, якія ўсё страцілі і атрымліваюць мізэрную пенсію.
Усяго была аказана дапамога больш чым 980 тысячам чалавек.
«Крытычнае становішча скончылася, — адзначыў біскуп Кава, — аднак некаторыя патрэбы засталіся, і праца Касцёла па-ранейшаму неабходная». У прыватнасці, гаворка ідзе пра цывільных асобаў, якія пацярпелі ў ваенных дзеяннях і знаходзяцца ў шпіталях.
Па словах іерарха, гэты праект стаў «цудоўным знакам экуменізму», бо праводзіўся з удзелам пратэстанцкіх супольнасцяў і міжнародных арганізацый.
«Можна сказаць, — дадаў біскуп, — што гэтая ініцыятыва Святога Пасаду была адзінай, у якой мы працавалі па-сапраўднаму разам, каб дапамагчы насельніцтву».