16 ліпеня, у гадавіну апошняга аб’яўлення Маці Божай святой Бэрнардэце Субіру, санктуарый у Люрдзе арганізуе сусветную віртуальную пілігрымку ў грот аб’яўленняў. На гэты дзень плануецца 15-гадзінная трансляцыя па тэлебачанні і ў інтэрнэце.
Як паведамляе агенцтва КАІ, гэта стала рэакцыяй на сітуацыю, якая склалася ў санктуарыі з прычыны эпідэміі.
Штогод туды прыбывае 3 мільёны пілігрымаў, у тым ліку 50 тысяч хворых і людзей з інваліднасцю, якімі апякуецца 100 тысяч валанцёраў.
Сёлета амаль усе гэтыя людзі не змогуць прыехаць у Люрд. І менавіта з думкай пра іх санктуарый рыхтуе гэтую выключную ініцыятыву.
Такім чынам вернікі ва ўсім свеце змогуць духоўна далучыцца да Эўхарыстыі і Ружанца ў гроце, а таксама да традыцыйнай працэсіі са свечкамі. Плануюцца таксама сведчанні і праграмы пра розныя аспекты місіі гэтага санктуарыя.
У сувязі з эпідэміяй як санктуарый, так і ўвесь Люрд, які існуе ў значнай меры дзякуючы пілігрымам, апынуліся ў вельмі складанай сітуацыі. Рух пілігрымаў сёлета вельмі абмежаваны.
У санктуарыі, дзе працуюць 320 чалавек, ацэньваюць, што ён страціў з-за эпідэміі 8 мільёнаў еўра.
Нягледзячы на гэтыя праблемы, санктуарый, аднак, не адмаўляецца ад сваёй духоўнай місіі і таму стараецца дасягнуць вернікаў такім незвычайным чынам.
