13 мая, калі Касцёл успамінае аб’яўленні Найсвяцейшай Панны Марыі ў Фаціме, у гэтым партугальскім мястэчку зазвычай збіраліся дзясяткі і нават сотні тысяч пілігрымаў.
Кожны год санктуарый Маці Божай Фацімскай наведваюць мільёны вернікаў і турыстаў з усяго свету.
Сёлета з-за пандэміі каранавірусу ўрачыстасці ў фацімскім санктуарыі ў 103-ю гадавіну аб’яўленняў адбываліся надзвычай сціпла.
Працэсія з фігурай Маці Божай Фацімскай прайшла па практычна пустым вялізным пляцы перад базылікай.
З-за каранцінных абмежаванняў, якія дзейнічаюць у краіне, нават мясцовыя вернікі не змаглі ўзяць удзел у сёлетніх урачыстасцях.
Падчас цэлебрацыі быў прачытаны спецыяльны ліст Папы Францішка, у якім Святы Айцец заклікаў вернікаў маліцца за «незлічоных ахвяраў каранавірусу».
