Тысячы пілігрымаў ідуць у санктуарый Маці Божай Ружанцовай у Фаціме: фіксуюцца найбольшыя групы пілігрымаў з усёй краіны з моманту пандэміі COVID-19 у 2020 годзе.
Пра гэта са спасылкай на партугальскія СМІ на падставе інфармацыі паліцэйскіх службаў паведамляе Каталіцкае інфармацыйнае агенцтва КАІ. Паводле ацэнак супрацоўнікаў партугальскай дарожнай паліцыі, большасць пілігрымаў, якія кіруюцца ў Фаціму, прыйдуць у санктуарый у суботу.
Галоўнай нагодай пілігрымкі ў сусветна вядомае месца Марыйнага культу з’яўляецца 107-я гадавіна з пачатку аб’яўленняў Марыі тром пастушкам у Кова-да-Ірыя.
Паводле звестак спецслужбаў, на ўрачыстасці, якія распачнуцца ўвечары ў нядзелю, у Фаціму могуць прыбыць больш за 500 тыс. пілігрымаў, пераважна партугальцаў.
Гэтыя ўрачыстасці ўзначаліць ардынарый дыяцэзіі Лейрыя-Фацімы біскуп Хасэ Арнэлас, Старшыня Канферэнцыі епіскапату Партугаліі.
Як паведамляе кіраўніцтва партугальскага санктуарыя, шматтысячныя пілігрымкі, якія кіруюцца ў Фаціму ў другі тыдзень мая, узгадняюцца з Фацімскім рэктаратам і паліцэйскімі службамі праз платформу Vost Portugal. Гэта дазваляе групам пілігрымаў атрымліваць інфармацыю аб дарожным руху па ўсёй краіне, а таксама практычныя парады па размяшчэнні.
На думку каментатараў, большая чым у папярэднія гады колькасць на дарогах пілігрымаў, якія кіруюцца ў Фаціму, звязана не толькі са зняццем супрацьэпідэмічных абмежаванняў, але з’яўляецца вынікам ажыўлення рэлігійнага жыцця пасля Сусветных дзён моладзі, якія праходзілі ў Партугаліі ў мінулым годзе.
