6 лютага мы пісалі, што з падазрэннем на каранавірус у шпіталь трапіў пажылы кітайскі біскуп Джозэф Джу Бааю з Наньянскай дыяцэзіі (правінцыя Хэнань), у якога інфекцыя была пацверджана.
Як 18 лютага са спасылкай на азіяцкае каталіцкае інфармацыйнае агенцтва Ucanews паведаміла КАІ, кітайскі біскуп ужо выйшаў са шпіталя.
98-гадовы іерарх стаў на сённяшні дзень найстарэйшым пацыентам, які выздаравеў ад хваробы, выкліканай смяротна небяспечным уханьскім каранавірусам.
Выздараўленне біскупа падобнае да цуду, паколькі, як сцвярджаюць медыкі, менавіта пажылыя пацыенты знаходзяцца ў групе рызыкі і найчасцей становяцца ахвярамі каранавірусу.
Джозэф Джу Бааю ў 2002–2010 гадах быў прызнаным Святым Пасадам біскупам Наньянскай дыяцэзіі.
Іерарх, які належаў да непрызнанага дзяржавай «падпольнага» Касцёла, шмат гадоў правёў у вязніцах і працоўных лагерах. Біскупскае пасвячэнне патаемна прыняў у 1995 годзе, стаўшы біскупам каад’ютарам у Наньяне.
